ಶ್ರೀ ಉಮಾಮಹೇಶ್ವರ ದೇವಸ್ಥಾನ 

ಶ್ರೀ ವಾಜಿಲ್ಲಾಯ ಧೂಮಾವತಿ ದೈವಸ್ಥಾನ 

 ಶ್ರೀ ಕ್ಷೇತ್ರದ ಜೀರ್ಣೋದ್ಧಾರಕ್ಕಾಗಿ ಅಷ್ಟಮಂಗಲ ಪ್ರಶ್ನೆಯನ್ನು ಇರಿಸಿದ ಸಂದರ್ಭದಲ್ಲಿ, ಸಂಪೂರ್ಣ ನಶಿಸಿದ ಶ್ರೀ ವಾಜಿಲ್ಲಾಯ ಧೂಮಾವತಿ ದೈವಗಳ ದೈವಸ್ಥಾನ ಇತ್ಯಾದಿಗಳನ್ನು ಪ್ರಥಮವಾಗಿ ಜೀರ್ಣೋದ್ಧಾರ ಮಾಡಬೇಕೆಂಬ ಸೂಚನೆಯೂ ಕಂಡುಬಂದಿರುತ್ತದೆ. ಈ ದೈವಸ್ಥಾನವು ಇಡೀ ಗ್ರಾಮಕ್ಕೆ ಸಂಬಂಧಿಸಿದ ದೈವಸ್ಥಾನವಾಗಿದ್ದು, ಗ್ರಾಮದಲ್ಲಿ ನಾಲ್ಕು ಕಡೆ ದೈವಗಳ ಆರಾಧನೆ ನಡೆಯುತ್ತಾ ಇತ್ತು. ಈ ದೈವಸ್ಥಾನಕ್ಕೆ ಪ್ರಾಚೀನ ಕಾಲದಲ್ಲಿ ಬಹಳ ಭೂಸಂಪತ್ತು ಇದ್ದು, ಒಂಭತ್ತು ವಿಭಾಗದ ಪಂಚರಕವರ್ಗದವರು ಇದ್ದರು. ಗಟ್ಟಿ ಸಮಾಜ ಬಾಂಧವರ ಆರಾಧ್ಯ ದೈವ ವಾಜಿಲ್ಲಾಯಿ ದೈವದ ಮೂಲಸ್ಥಳವಾಗಿರುತ್ತದೆ. ದೈವಸ್ಥಾನದಲ್ಲಿ ಧ್ವಜಾರೋಹಣ, ಬಂಡಿ ಉತ್ಸವ ಸಹಿತವಾಗಿ ಮೂರು ದಿವಸದ ನೇಮೋತ್ಸವವು ರಾಜರ ಉಪಸ್ಥಿತಿಯಲ್ಲಿ ನಡೆಯುತ್ತಾ ಇದ್ದು, ಕಾಲಕ್ರಮೇಣ ನೇಮೋತ್ಸವವನ್ನು ನಿಲ್ಲಿಸಿ, ದೈವಸ್ಥಾನವು ಸಂಪೂರ್ಣವಾಗಿ ಜೀರ್ಣವಾಗಿ ಬಿದ್ದುಹೋದ ಲಕ್ಷಣಗಳು ಕಾಣಿಸುತ್ತವೆ. ಇದರಿಂದಾಗಿ ಇಡೀ ಗ್ರಾಮಕ್ಕೆ ದೈವದ ಪ್ರಕೋಪ ಕಾಣಿಸುತ್ತದೆ. ಈ ದೈವಸ್ಥಾನ ವ್ಯಾಪ್ತಿಯು ಪೂರ್ವದಿಕ್ಕಿನಲ್ಲಿ ಮಾಣೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನ, ದಕ್ಷಿಣದಲ್ಲಿ ಅಡ್ಯಾರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ, ಪಶ್ಚಿಮದಲ್ಲಿ ಕುಲಶೇಖರ ಶ್ರೀ ವೀರನಾರಾಯಣ ದೇವಸ್ಥಾನ, ಉತ್ತರದಲ್ಲಿ ಕುಡುಪು ಶ್ರೀ ಅನಂತಪದ್ಮನಾಭ ದೇವಸ್ಥಾನದವರೆಗೆ ಇರುತ್ತದೆ.

ಪೆದಮಲೆ ಶ್ರೀ ಉಮಾಮಹೇಶ್ವರ ದೇವಸ್ಥಾನಕ್ಕಿಂತಲೂ ಪ್ರಾಚೀನ ಆರಾಧ್ಯ ಸ್ಥಳ ಈ ದೈವಸ್ಥಾನವಾಗಿದ್ದು, ಈಗಲೂ ಈ ಮಣ್ಣಿನಲ್ಲಿ ಶ್ರೀ ವಾಜಿಲ್ಲಾಯ ಧೂಮಾವತಿ ದೈವಗಳ ಸಾನಿಧ್ಯ ಅಂತರ್ಲೀನವಾಗಿದೆ.  ಶ್ರೀ ದೈವಸ್ಥಾನದ ಜೀರ್ಣೋದ್ಧಾರದ ಅಂಗವಾಗಿ ನೂತನವಾಗಿ ಆಯ ಪ್ರಮಾಣಬದ್ಧವಾಗಿ ದೈವಸ್ಥಾನ, ಪ್ರಾಕಾರಗೋಡೆ, ಬಾವಿ, ಗೋಪುರ, ಅಶ್ವವಾಹನ (ಕುದುರೆ ಬಂಡಿ), ಸೂಕರವಾಹನ (ಹಂದಿಬಂಡಿ),ಧ್ವಜಸ್ತಂಭ ಇವುಗಳ ನಿರ್ಮಾಣ ಆಗಬೇಕಾಗಿದೆ. ಶ್ರೀ ಉಮಾಮಹೇಶ್ವರ ದೇವಸ್ಥಾನದ ಸಮೀಪ, ಪೆದಮಲೆಗುತ್ತು ನೂತನ ಭಂಡಾರ ಚಾವಡಿಯನ್ನು ನಿರ್ಮಿಸಿ, ನೂತನ ಉಯ್ಯಾಲೆಯನ್ನು ನಿರ್ಮಿಸಿ, ನೂತನ ಮುಖಮೂರ್ತಿ, ಆಯುಧಗಳನ್ನು ಇಟ್ಟು, ನಿತ್ಯ ಆರಾಧನೆ, ಸಂಕ್ರಾಂತಿ ಆರಾಧನೆಗಳನ್ನು ನಡೆಸಬೇಕಾಗಿದೆ. ದೈವಸ್ಥಾನದಲ್ಲಿ ಧ್ವಜಾರೋಹಣವಾಗಿ ಕನಿಷ್ಠ ಎರಡು ದಿವಸದ ನೇಮೋತ್ಸವವನ್ನು ಬಂಡಿ ಉತ್ಸವ ಸಹಿತವಾಗಿ ನಡೆಸಬೇಕಾಗಿದೆ. ಈ ಬಗ್ಗೆ ಅಷ್ಟಮಂಗಲ ಪ್ರಶ್ನೆಯನ್ನು ಇಟ್ಟು ಸೂಕ್ತ ನಿರ್ದೇಶನವನ್ನು ಪಡೆದುಕೊಂಡು, ಪರಿಹಾರ ಪ್ರಾಯಶ್ಚಿತ್ತ ಕಾರ್ಯಗಳನ್ನು ನಡೆಸಿ, ವಾಸ್ತುಶಿಲ್ಪಕ್ಕೆ ಅನುಸಾರವಾಗಿ ಆಯಪ್ರಮಾಣಬದ್ಧವಾದ ನಕ್ಷೆ ಮತ್ತು ಅಂದಾಜುಪಟ್ಟಿಯನ್ನು ತಯಾರಿಸಲಾಗಿದೆ.